CHEO TOTAL NO 10º ANIVERSARIO DO FÁLAME SEMPRE

• A nova edición do evento conseguiu un cheo total no salón de actos da patronal Boirense
• Edición especial polo 10º aniversario no que se presentou un vídeo e unha publicación conmemorativa.
• O público que asistiu ao acto recibiu unha bolsa coa publicación e unha camiseta conmemorativa do evento.
• Os 5 poñentes tiveron pouco mais de 6 minutos para explicar a súa experiencia baixo o formato pecha kucha

Boiro, 19 de abril de 2024

Na noite de onte a A.B.E. coa colaboración do CONCELLO DE BOIRO organizaron unha nova edición dun dos eventos mais agardados na programación anual da asociación, o evento de experiencias innovadoras con empresas creativas que nesta ocasión celebrou o seu 10º aniversario.

Nun salón de actos cheo ata a bandeira os 5 poñentes contaban con pouco mais de 6 minutos para contarnos a súas experiencias xa que para as presentación usouse o formato Pecha Kucha de 20 imaxes que se proxectan cada 20 segundos.

Sen previo aviso apagáronse as luces e proxectouse un vídeo especial conmemorativo dos 10 anos do evento especialmente editado para a ocasión e ao seu remate tomou a palabra o presidente da ABE, Daniel García que se amosou exultante xa que ”é un pracer celebrar o 10º aniversario deste evento nun salón de actos cheo de caras coñecidas”, a intervención comezou facendo un recordatorio das 10 edicións do evento “Foi no inverno de 2012 cando, case por casualidade e sen saber o potencial que tería no futuro, cando a ABE organizou o primeiro Pecha Kucha Boiro. Fíxose no salón de actos, que daquela non estaba amoblado, e naceu como o fan moitas cousas bonitas, con ilusión e poucos medios”

“Agora que celebramos o 10º aniversario podemos dicir con orgullo que a aposta pola idea de que a conxunción de cultura e empresa pode favorecer a creación de iniciativas sostibles e rentables foi acertada e para elo só temos que repasar o listado de convidados ao longo destes anos. Para todos eles o noso máis sincero agradecemento ao igual que ao concello de Boiro por apoiar sempre a iniciativa e a todos vós que cada ano nos acompañades nunha das citas ineludibles da comunidade cultural e empresarial Boirense “

Finalizada a introdución, Daniel deu paso aos primeiros convidados os compoñentes do grupo musical Triángulo de Amor Bizarro, Isa, Rodrigo e Rafa explicaron a traxectoria do grupo con base en Barbanza que explicaron “que tras 20 anos de carreira e a pesar de tocar en salas e festivais de moitos países a decisión de ter a base en Barbanza foi un acerto xa que o entorno cultural Boirense tan activo favorece á creatividade do grupo e nos aporta sinerxias positivas”

Neste punto, Alberto García, técnico de cultura do concello de Boiro, asumiu a presentación do acto dando paso á cooperativa Charlatana que como explicou, Eva Triñanes, unha das socias “ é un novo espazo galego de creación, produción e  distribución propia que integra diversas disciplinas artísticas: circo, música, teatro infantil e contos” “Charlatana nace para crear un espazo de cooperación no que conflúan diversas propostas artísticas onde o obxectivo común é DIVERTIR e EDUCAR. A través do humor, o espíritu crítico, e o debate en escena, Charlatana crea espectáculos que integran valores como a igualdade, a cooperación, a reciclaxe e a cultura e lingua galegas.”

E da cooperativa cultural pasamos a un dos festivais mais representativos da comunidade o Revenidas que como explicou un dos promotores do festival, Alfonso Vilanova “naceu a partir dunha festa popular que se celebraba na vila mariñeira de Vilaxoán, na que os veciños compartían e degustaban un dos froitos máis cobizados do seu traballo: as sardiñas asadas, que neste lugar chámanse, precisamente, revenidas. De aí toma o nome o festival.”

Chegados a este punto o presentador da paso a unha iniciativa da comarca, Quinteiro Doce que como explica Luís Tembra, CEO da empresa “tras mais de 40 anos de traxectoria hai 10 que decidimos crear a marca quinteiro doce apoiada na cultura do país e distribuímos produtos artesáns a través do comercio local galego”

Para finalizar foi a quenda de Antón Riveiro, un dos autores de máis prestixio da narrativa galega actual e con obras traducidas a varias linguas e que explicou “as complexidades da vida do escritor” reivindicou a súa figura de autónomo e relatou “as dificultades coas que se atopa a profesión do artista á hora de poder ser profesional da mesma sendo moi complicado vivir desa actividade en exclusiva. 

O acto pechouse coa intervención do alcalde de Boiro que quixo destacar “a  puxanza do sector económico e cultural da comarca e o enorme potencial que aínda ten por desarrollar” ademais quixo poñer en valor “ o traballo da ABE a prol do tecido empresarial local e darlle a noraboa pola organización do evento duante estes 10 anos.

Unha vez rematado o evento público, organización e poñentes puideron desfrutar duns pinchos nun ambiente distentido.

Como recordo o público levou de agasallo un vaso e unha camiseta conmemorativa do evento na que lucían os nomes das mais de 50 empresas que participaron no evento ao longo das 10 edicións.